Marathi News

ashish shelar: राज्यपाल या पदाला आपण सन्मान देणार आहात का?; शेलारांचा सरकारवर निशाणा – bjp mla ashish shelar has criticized thackeray govrnment over farmer issues and high electricity bills


म. टा. प्रतिनिधी, पुणे

देवेंद्र फडणवीस यांच्या नेतृत्वाखाली सरकार स्थापन झाले तेव्हा वीज कंपन्यांवरील १९ हजार कोटी रुपयांची थकबाकी आम्ही सरकारमधून बाहेर पडलो तेव्हा ३० हजार कोटींनी वाढली. राज्यातील ४५ लाख शेतकरी अडचणीत असताना त्यांच्या वीजबिलात केलेली ती मदत होती. ठाकरे सरकार ४५ लाख शेतकऱ्यांना केलेल्या मदतीची चौकशी करणार असेल; तर त्यास आमचा विरोध नाही. मात्र, त्यामध्ये शेतकरी अडचणीत आले, तर गाठ आमच्याशी आहे,’ असा इशारा भारतीय जनता पक्षाचे नेते आशिष शेलार यांनी दिला.

विधान परिषदेच्या निवडणुकीच्या प्रचारार्थ शेलार यांनी पुण्यात पत्रकार परिषदेत महाविकास आघाडी सरकारवर जोरदार टीका केली आहे. वीज कंपन्यांची ६७ हजार कोटी रुपयांच्या थकबाकीच्या चौकशीचा निर्णय सरकारने घेतल्यानंतर १०० युनिटपर्यंत वीज बिल माफ करण्याच्या मागणीने पुन्हा जोर धरला आहे. या पार्श्वभूमीवर शेलार यांनी सरकारवर टीका करताना गेल्या ११ महिन्यांत महाविकास आघाडीचे सरकार आल्यानंतर १९ हजार कोटींची थकबाकी का झाली, याचेही उत्तर या चौकशीत आले पाहिजे, अशी मागणी केली आहे. ऊर्जामंत्री नितीन राऊत यांनी कोणीही मागणी न करता शंभर युनिटपर्यंत मोफत वीज देण्याची घोषणा केली होती. ही घोषणा करताना तिन्ही कंपन्यांना आर्थिक ताळेबंदाचा अभ्यास न करता घोषणा केली होती का, असा सवाल शेलार यांनी केला.

‘सरकार म्हणजे छळवणुकीचे केंद्र’

शाळा सुरू करण्याबाबत सरकारने संभ्रम निर्माण केला आहे. शाळा सुरू करण्याची तारीख निश्चित करण्यापूर्वी सरकारने जिल्हाधिकारी, शिक्षणाधिकारी, पालक, शिक्षक, विद्यार्थी संघटनांशी चर्चा करायला पाहिजे होती. स्थानिक पातळीवर जिल्हाधिकारी निर्णय घेणार, मुले पाठवायची की नाही हे पालक ठरवणार; मग सरकार काय करणार, असा प्रश्न उपस्थित करून शेलार यांनी सरकारचा हा केवळ पळपुटेपणा आहे. हे सरकार आहे छळवणुकीचे केंद्र असल्याचे वाटू लागल्याची टीकाही त्यांनी केली.

‘सामूहिक नेतृत्वावर पक्ष चालतो’

भाजपने मुंबई महापालिकेच्या आगामी निवडणुकीची जबाबदारी आमदार अतुल भातखळकर यांना दिल्याने शेलार यांचे पंख छाटल्याची चर्चा आहे. यावर बोलताना शेलार म्हणाले, ‘सामूहिक नेतृत्वावर पक्ष चालतो. त्यामुळे मुंबई आणि ठाण्यात आम्ही एकत्रितच काम करत असतो, चर्चा करूनच पक्षात निर्णय होतात आणि त्या चर्चेला मीसुद्धा असतो.’

‘अल्टिमेटम कोणाला?’

‘राज्यपालांना लिखित ‘अल्टिमेटम’ द्यायचे प्रदर्शन कसे योग्य असू शकते. कायद्यामध्ये असे कुठेही वाक्य नसताना असे आपण ‘अल्टिमेटम’ कसे देऊ शकतो. राज्यपाल या पदाला आपण सन्मान देणार आहोत का? याचा राज्य करणाऱ्या पक्षांनी विचार करायला पाहिजे. मुळात ‘अल्टिमेटम’ हा शब्दच आम्हाला मान्य नाही. त्यामुळे अशा प्रकारच्या ‘अल्टिमेटम’ला कोणी जुमानेल, असे मला वाटत नाही,’ असे शेलार म्हणाले.



Source link

You may also like

Leave a Reply

Your email address will not be published. Required fields are marked *

%d bloggers like this: