Pomegranate Price: Pomegranate Price: डाळिंबाला मिळाला विक्रमी भाव; ‘त्या’ शेतकऱ्यांना अतिवृष्टीचा असाही ‘लाभ’! – pomegranate got record price in atpadi market


सांगली: अतिवृष्टीने डाळिंब बागांचे नुकसान झाल्यानंतर बाजारात डाळिंबाची आवक घटली आहे. मागणीप्रमाणे डाळिंबाची उपलब्धता नसल्याने आटपाडीच्या सौदे बाजारात गुरुवारी डाळिंबाला तब्बल प्रतिकिलो ६२५ रुपये असा विक्रमी दर मिळाला. सांगोला (जि. सोलापूर) तालुक्यातील चोपडी गावातील पांडुरंग गायकवाड यांनी ६२५ रुपये दराने डाळिंबाची विक्री केली. याशिवाय इतर शेतकऱ्यांनाही सरासरी ३०० ते ४०० रुपये प्रति किलो दर मिळाल्याने डाळिंबाची आवक घटली तरी उलाढाल वाढत आहे. ( Pomegranate Price Latest News Updates )

वाचा: महाराष्ट्रातील ‘या’ गावाचं थेट युरोप कनेक्शन; शरद पवारही झाले थक्क!

सप्टेंबर आणि ऑक्टोबर महिन्यात झालेल्या अतिवृष्टीमुळे राज्यातील डाळिंब बागांचे नुकसान झाले. सांगली जिल्ह्यातील आटपाडी, खानापूर, विटा, जत यासह सोलापूर जिल्ह्यातील सांगोला, पंढरपूर, मंगळवेढा परिसरातील बागांना याचा फटका बसला. अनेक शेतकऱ्यांचे हातचे पीक वाया गेले, परिणामी डाळिंबाची आवक घटली आहे. आटपाडी बाजार समितीच्या सौदे बाजारात यापूर्वी सांगली, सातारा आणि सोलापूर जिल्ह्यातून रोज सरासरी ८०० ते १००० टन डाळिंबाची आवक सुरू होती. गेल्या महिन्यापासून यात कमालीची घट झाली. सध्या केेवळ १५० ते २०० टन डाळिंबाची आवक होते. आवक नसल्याने सांगोला, पंढरपूर, अकलूज, इंदापूर येथील डाळिंब सौदे बंद आहेत. मागणीप्रमाणे डाळिंबांची उपलब्धता नसल्याने दरात मोठी वाढ झाली आहे.

वाचा: लुटारू, फालतू आणि बरंच काही!; शेट्टी-खोत वादाची ठिणगी कुणामुळे पडली?

आटपाडी बाजार समितीमध्ये गुरुवारी बाजार समितीचे संचालक पंढरीनाथ नागणे यांच्या मंगलमूर्ती फ्रूट सप्लायर्सच्या अडत केंद्रावर चोपडी येथील पाडुरंग गायकवाड डाळिंब विक्रीसाठी आले होते. सौद्यांमध्ये त्यांच्या डाळिंबांची तब्बल ६२५ रूपये प्रतिकिलो दराने विक्री झाली. तर त्यांच्याच अन्य डाळिंबाला ६०० रुपयांचा दर मिळाला. सांगोला तालुक्यातील अनकटाळ येथील नामदेव बंडगर यांच्या डाळिंबाला ४२५ रुपये एवढा दर मिळाला. नाझरा येथील सिद्धनाथ सरगर यांच्या डाळिंबाला ४०० रुपये, बलवडी येथील मन्सूर शेख यांच्या डाळिंबाला १२५ रुपये, फडतरी येथील सुरेश तबारे यांच्या डाळिंबाला १५१ रुपये दर मिळाला. डाळिंबाला विक्रमी दर मिळाल्याने शेतकऱ्यांनी समाधान व्यक्त केले. दरम्यान, डाळिंबाची आवक कमी असली तरीही विक्रमी दरामुळे सौदे बाजारात उलाढाल वाढत आहे, अशी माहिती बाजार समितीचे संचालक पंढरीनाथ नागणे यांनी दिली.

वाचा: अतिवृष्टीमुळं ‘या’ जिल्ह्याला होणार यंदा मोठा फायदा



Source link

Leave a Reply